O Concello de Mondariz conta dende onte cun novo distintivo SICTED de compromiso de calidade turística que se suma aos 52 existentes no Xeodestino Condado Paradanta e que contribúen á posta en valor dos dez concellos que forman este territorio: A Cañiza, As Neves, Arbo, Covelo, Crecente, Mondariz, Mondariz Balneario, Ponteareas, Salceda de Caselas e Salvaterra de Miño.
O alcalde de Mondariz, Calis Montes, foi o encargado de recoller en nome de A Baiuca, taberna gastronómica ubicada na praza de abastos, o distintivo de calidade. No acto tamén recolleu o seu distintivo o restaurante o Castelo que renovou o seu selo ao igual que a empresa Celtic Ways.
O SICTED é un proxecto de mellora da calidade dos destinos turísticos promovido pola secretaría de estado de Turismo (SETUR) co apoio da Federación Española de Municipios e Provincias (FEMP) que traballa con servizos turísticos de ata 37 oficios diferentes co obxectivo de mellorar a experiencia e a satisfacción do turista. O aloxamento rural A Cantaruxa Maruxa, o hotel Balneario de Mondariz e o Hotel Cemar, todos eles empresas de Mondariz, contan co certificado SICTED.
O alcalde felicita a todas estas empresas, emprendedores e iniciativas polo seu traballo diario na procura dun servizo e produto excelente que mellora non só o seu negocio, tamén a imaxe do concello e da comarca.
Alcaldías do sur da provincia, Turismo de Galicia, AGADER, Deputación de Pontevedra, Federación Provincial de Turismo e Hostalería FEPROTUR, e a nova asociación de Empresas do Turismo no xeodestino Condado Paradanta, ASECOTUR, entre outras entidades públicas e privadas, asistiron a este evento que recoñece o esforzo e a seriedade no traballo tanto das novas empresas como das que renovan o certificado de calidade.